KA NOBENA KHRISTMAS
KA NOBENA KHRISTMAS (Ka Lynti Bneng Barim Sla 156)
(Rwai man ka sngi naduh u Nohprah 16 tarik haduh ka Miet 24 tarik.) (Їeng)
N. - Ko Blei to wan ban ïarap ia nga.
B. - Ko Trai, to pynkloi ban iarap ia nga.
N. - Ka burom ha u Kpa…..
B. - Kumba ka la long….. Amen.
KA SUR BASYIANG
1.
Ka sur basyiang ka par kylleng,
Jingdum ïong ngit ka sam lyngba;
Syrngiew badum ki tbeh jingshai,
Jisu U wan ban pynthaba.
2.
U Khun langbrot na bneng U hiar
Ban dup siewspah ï’u khunbynriew.
Ngin jaw ummat, ngin sngewsih kthang
Їa la ki pop kuna ban siew.
3.
U Trai bakhraw burom ka bor,
Ka jinglong briew bapoh U phong:
Ka doh jong ngi ka doh jong U,
Ban siew kuna da la jingmong
4.
Ka kpoh batlem ka Kmie U jied,
Ka khet phyrnai jong U ban long;
La kam sngewthuh ki jingmaïa,
Ryngkat bad ka b'U ieid ban shong
5.
Tempyl u Blei ha kut shadem,
Ka seng nongrim b'Un shong Un sah.
Їa jinglongkmie ka shim burom,
Ka Theisotti junom ka sah.
6.
H’u Blei u Kpa burom kan long,
Kumjuh h'u Khun marwei jong U,
H'u Nongpyntngen Mynsiem Bakhuid
Junom junom sha bymjukut.
Ї’U SYIEM KYNRAD
(Shong)
Ї’u Syiem Kynrad uban sa wan, ale ngin ïamane (2 sien).
To risa, ko khun Zion, / bad to kmen tyngeh ko khun Jerusalem, / khmih u Trai Kynrad Un sa wan, / bad jingshai bakhraw kan don ha kata ka sngi, / bad ki lum bah kin tuid jingbang jingthiang, / bad ki lumrit ka dud ka ngap, / ba Un wan u Nongiathuhlypa bakhraw, / bad Un sa pynthymmai ka Jerusalem.
Ї’u Syiem Kynrad........
Hakhmih Un wan u Blei / bad u Briew na ïing u Dabid ban shong halor ka khet, / te phin i ïa U, / bad kan kmen hun ka dohnud.
Ї’u Syiem Kynrad........
Hakhmih Un wan u Trai u Nongïada jong ngi, / u Bakhuid ki Israel, / Uba phong halor ka khlieh ka pansngiat jong ka hima, / bad Un synshar naduh duriaw bah haduh duriaw bah, / bad naduh wah bah shaduh bakut shi tyllup ka pyrthei.
Ї’u Syiem Kynrad.......
Hakhmih u Trai kynrad Un wan paw; / ngeit skhem, Un ym lamler, / la U slem, ba Un wan: to ïai-ap ïa U, / naba shisha Un wan bad Un ym pep.
Ї’u Syiem Kynrad.......
U Trai Un sa wan hiar kum u slap h'u shniuh langbrot; / ha ki sngi jong U kan sa mih thaba phalang ka hok, / bad kyrhai kan dap ka jingsuk, / bad baroh ki syiem pyrthei kin mane ïa U, / baroh ki byn riew kin dem ïa U.
Ї’u Syiem Kynrad.....
Yn kha ha ngi ïa u Khunlung, / bad yn khot ïa U u Blei u badonbor, / ha ka khet u Dabid u kpa jong U, / Un shong bad Un synshar; / ïa ka jingsynshar ha tyr peng lajong Un bah.
Ї’u Syiem Kynrad…..
Ko Bethlehem, ko Nongbah jong u Blei bahalor tam, / na Pha Un mih u nongsynshar ki lsrael, / bad ka jingwan mih jong U, / kan long kum kaba sdang ka bymjukut, / te yn pynkhraw ia U hakhmat shityllup ka pyrthei, / bad ha ka khyndew ka jingsuk ynda U wan.
Ї'u SyiemKynrad......
(Ha ka sngi Peitmiet Khristmas)
Lashai ka sngi / ïa ki pop ka pyrthei baroh yn sa pyndam, / bad ha ngi Un synshar u Nongsiewspah ka pyrthei.
Ї’u Syiem Kynrad......
U la jan mynta u Trai, / ale ngin ïamane.
KA PSALM (1)
KYNHOI RISA BNENG BAD KHYNDEW
(Laetentur coeli)
1.
Kynhoi risa, bneng bad khyndew:
To rwai ïaroh, ko lum.
Lum bah kin bthei da ka jingkmen,
Lum rit ruh da ka hok.
Naba u Trai jong ngi Un wan,
La ki rangli is'nei.
Kynmaw, a Trai, wan jngoh ia ngi
Da jingpynim jingblei.
2.
Kum ka umjer, ko bneng, kum slap
Pynhap ïa u Bahok;
Pha ruh to ang, khyndew,nangkha,
Seilung ï’u Nongpynim.
Pyni, ko Trai, la jingis'nei,
Ka jingpynim to ai.
To phah ï’u Nongsynshar pyrthei,
U Syiem mariang, u Trai.
3.
To wan, ko Trai, u Blei donbor:
To peit, bad ngin lait-im.
Wan jngoh ïa ngi ha ka jingsuk,
Ngin kmen bad ngin ïoh im.
Ba ha jingim pyrthei ngin bud
ïa ka lynti jong Me:
Pynbna ha ki jentil baroh
Ka jingpynim jong Me.
4.
To wan, ko Trai, to wat pynslem:
Jingkhum l'u paid wan law.
Pynkhie ïa la ka bor bad wan,
Pynim na jinglong mraw.
A Men da kad ki bneng bad wan:
Ki lum kin shad sngewkmen.
Pyni ïa la ka khmat ha ngi,
Ko Trai, u Syiem ki bneng.
5.
Burom h’u Blei u Kpa donbor
Nongseng ka jaitbynriew;
Burom h'Uba siewspah ïa ngi,
Khun blei kylla Khun briew;
H'u Nongpyntngen, Nongpynthymmai,
Mynsiem Bakhuid u Blei,
Ka dem ka nguh,
ka rwai khlem pud:
Burom h'u Blei Lai wei.
(l) Ha ka jingshisha, kane kam dei na ki Psalm, hynrei la shim na bun ki kitab jong ka Jutang Barim.
13
KA LYNNONG RIT
U Nongialam
lynti jong ngi, u Khun langbrot ba khlem thoh dak, U rung na ka bynta jong ngi,
ba la pynlong kum u Melkhizedek, u Lyngdoh sha bymjukut bad junom la junom, U
long u Syiem jong ka hok, ka pateng jong U kam don jingkut.
P. - Ka jingsngewnguh Ï'u Blei.
14 KA JINGPULE NA KA KTIEN U BLEI
(Lah ban pule shaphang ka jingpynkhreh ia ka jingwan u Jisu Khrist na ka Jutang Barim ne Jutang Bathymmai).
(Shong)
KA JINGIATHUH KHANA BALYNGKOT.
15 KI SYMBUD LYNGKOT
N. - Wan ban siewspah la ngi, ko Blei badonbor baroh.
P. - Wan ban siewspah ia ngi, ko Blei badonbor baroh.
N. - To phai ki khmat jong Me sha ngi bad ngin sa lait-im.
P. - To phai ki khmat jong Me sha ngi bad ngin sa lait-im.
N. - Ka burom ha u Kpa....
P. - To phai ki khmat jong Me sha ngi bad ngin sa lait-im.
KI ANTIPHON
16 tarik: Hakhmih u syiem un wan, u Kynrad jong ka pyrthei; ma U, Un weng noh ia ka lyngkor longmraw jong ngi.
17 tarik: Ko Jingstad ba mih na ka shyntur
u Bahakhlieh tam. Pha kot na tduh sha tduh: Pha pynïaid ia kiei kiei baroh da
ka bor bathiang. To wan ban hikai ïa ngi ïa ka lynti jong ka Jinghusiar.
18 tarik: Ko Adonai bad ko Nongïalam jong
ka Їing Israel! Ma Me Uba la paw ha u Moses ha ka ding jong u diengkynthong ba
mehding, bad Uba la ai ha u ïa ka Aiñ halor u Lum Sinai: ale to wan ban pynim
ia ngi da ki kti bakner jong Me.
19 tarik: Ko Thied bah jong u Jesse, Uba ïeng
kum ka Lama hakhmat ki pyrton: hakhmat jong Me ki syiem kin ym nud ban plie ia
la ki shyntur, bad hakhmat jong Me ki hima sima kin duwai. Ale ban pyllait-im ïa
ngi; ale, wat pynslem.
20 tarik: Ko Shabi jong u Dabid bad ko
Borsynshar jong ka Їing Israel, ma Me Uba plie bad ym don uban khang, Uba khang
bad ym don uban plie: ale ban ïalam noh ïa ki koidi na ka byndi badum bad na ka
syrngiew jong ka jingïap.
21 tarik: Ko Step phyrngab baphyrnai jong
ka Jingshai bymjukut, bad ko sngi jong ka hok, ale ban pynshai ïa kito kiba
shong ha ka jingdum bad ha ka syrngiew jong ka jingïap.
22 tarik: Ko Syiem jong ki hima sima bad ko
jingthrang jong ki; ko Mawdong bapynïasnoh kawei: ale ban pynim ïa u bynriew,
uba Me la thaw na ka shi kham ka khyndew.
23 tank: Ko Emanuel, ko Syiem bad ko
Nongthaw ain jong ngi: ki ri baroh ki khmih lynti ia Me, u Nongpynim. Ale ban
pynim ïa ngi, ko Trai ko Blei jong ngi.
24 tarik: Haba ka sngi ka la mih ha ki
bneng, phin sa ïohi ïa u Syiem ki syiem Uba wan na u Kpa, kum u nongleit kurim
na la ka kamra.
17 MYNSIEM JONG NGA (Lk 1: 46-55)
1.
Mynsiem jong nga ï’u Trai ka ïai-risa,
Ka kmen hu Blei u Nongpynim jong nga.
Naba U ieid shakri barit jong U,
Bynriew kin khot ïa nga ka b'la kyrkhu.
2.
U Badonbor kam khraw ha nga U leh:
Kyrteng jong U bakhuid junom kan neh.
Pateng pateng U ai la jingisnei
Їa ki bynriew kiba sheptieng ï’u Blei
3.
U sei ka bor na la ksangkti lajong:
U pynsakma dumbuit ki basarong.
U pynhiar khet ki bakhraw bor basniew;
Ki rit ki ria rangli U la kyntiew.
4.
Їa ki bathngan U ai jingbam babha:
Ki bariewspah U da phah noh suda.
U la shanbor Isr'el, shakri u Blei
U la kynmaw ïa la ka jingisnei.
5.
U la kynmaw kumba U la ïakren,
Ka jingkular b'U ai ki kpa tymmen:
Ka jingkular kaban neh skhem khlem duh,
H'u Abraham bad ha ki khun jong u.
6.
Mynsiem jong nga, risa ï’u Blei Lai wei
U Kpa Nongseng, Khun Nongsiewspah pyrthei,
Bad u Mynsiem Bakhuid Nongpynthymmai;
Risa, mynsiem jong nga, risa ï’u Trai.
(Duwai biang ia ka antiphon)
Lyngdoh - U Trai Un don ryngkat bad phi.
Paidbah - Ryngkat bad phi ruh.
To NGIN ЇADUWAI:
To pynkloi, ko Trai, bad wat slem shuh: wanrah ia la ka jingïarap na bneng.
Khnang ba ngi kiba ngeit bad kyrmen ngin ioh ka jingpynim da ka jingwan jong Me.
Me Uba im bad Uba synshar junom la junom. Amen.
Lyngdoh - U Trai un don ryngkat bad phi
Paidbah - Ryngkat bad phi ruh.
Lyngdoh - U Blei badonbor baroh, U Kpa, bad u Khun, bad u Mynsiem bakhuid, Un kyrkhu ra phi.
Paidbah - Amen
(Ha bym don Lyngdoh, u nongialam u pynkut kumne):
Nongïalam: Ko Trai to sngap isnei ïa ka jingduwai jong nga.
Paidbah: Bad ka jingpyrta jong nga kan poi sha Me.
Nongialam: Yn ïaroh ia u Trai.
Paidbah: Ngi sngewnguh ia u Blei
Nongialam: Yn ïaroh ia u Jisu Khrist.
Paidbah: Junom la junom. Amen.
Khristmas Basuk Bad Bakmen Ia Phi
Na U Donkupar Lyngdoh Marshillong
234
ReplyDelete